‘A gente parla sempe, nun s’arrenne,
‘e vvote pure ‘a notte arape ‘a vocca
dicenne cose ca nun se ne ‘ntenne,
e parla pure quanno nun l’attocca.

Putessemo sfruttà chistu difetto!
Fecessemo denare overamente.
Se tratta ‘e purtà ‘nnanze ‘nu progetto
però senza fa ‘mbruoglie, onestamente.

Ogne crestiano dint’a ‘nu libretto
avesse ‘a ripurtà iuorno pe’ ghiuorno
tutt”e discorze fatte cu difetto
e ‘e scemità cuntate tuorno tuorno.

Po’, ognuno ‘e nuje a’ fine d”a jurnata
‘na bella somma avess’appriparà,
facendo dint”o libro ‘n’assummata
‘e mille lire p’ogne scemità.

Putessemo campà tranquillamente
facendo sfarze tutte quante aunite,
prestanno sorde pure a ll’ata gente,
a’ Russia, a’ Francia e pure...a ‘e State Unite.